Fimmtudagur 11.01.2018 - 15:18 - Ummæli ()

Prótókollstjórinn Hanna Birna

Orðið á götunni er að þörfin á samskiptareglustjóra hafi verið áþreifanleg á dögunum. Samskiptareglustjóri er annað orð yfir starfsheitið prótókollstjóri, en einn slíkur starfar í utanríkisráðuneytinu. Hann sér meðal annars um að halda í heiðri allskyns venjum og samskiptareglum og er sérfræðingur í að raða háttsettum gestum til borðs.
Haldið var veglegt heimsþing WPL samtakanna hér á landi í lok nóvember, en um 400 konur mættu á viðburðinn, þar af um 100 konur í valdastöðum, svo sem forsetar og forsætisráðherrar. Hanna Birna Kristjánsdóttir er stjórnarformaður samtakanna og hafði umsjón með skipulagningunni, ásamt Alþingi og utanríkisráðuneytinu. Prótókollstjórinn var þó upptekinn við önnur störf.

Eftir stíf fundar- og ræðuhöld í Hörpu, var blásið til veislu í Menningarhúsinu, þar sem boðið var upp á dýrindis mat og drykk gestum til mikillar ánægju. Setið var við nokkur langborð sem náðu þvert yfir allan salinn, en við enda eins langborðsins var háborðið, þar sem merkilegustu gestirnir sitja. Um klukkutíma áður en gestum var hleypt inn í salinn, hófst hópur opinberra starfsmanna við að raða hvítum A4 blöðum á háborðið, með nöfnum merkisgestanna.

Að sögn viðstaddra var þetta nokkuð skondin sjón, því enginn virtist vita hvernig best væri að raða þessum tignargestum, sem samanstóð af forseta Íslands, forsætisráðherra, forseta Alþingis, Hönnu Birnu, nokkrum ráðherrum og mökum þeirra allra, ásamt frú Vigdísi Finnbogadóttur.
Þegar um ein mínúta var eftir þangað til að gestunum var hleypt inn, virtist sem að niðurstaða hefði fengist í málið. Konurnar þustu inn og heiðursgestirnir gengu að háborðinu. Hanna Birna var fyrst á svæðið og leit yfir háborðið. Leiftursnöggt færði hún til nokkur blöð án þess að mikið bæri á, enda gestir uppteknir við að heilsast og skiptast á ljúfyrðum. Virtist enginn taka eftir neinu og settust allir glaðir á svip, ánægðir með sína sessunauta.

Í hamaganginum hafði gleymst að gera ráð fyrir frú Vigdísi, en Hanna Birna reddaði málunum.

 

Ertu með athyglisverða ábendingu?
Sendu okkur póst á ordid@eyjan.is - fyllsta trúnaðar gætt.
«
»

Ummæli ()


Vinsamlegast athugið:
Ummæli eru á ábyrgð þeirra sem þau skrifa. Eyjan áskilur sér þó rétt til að fjarlægja óviðeigandi og meiðandi ummæli. Tilkynna má óviðeigandi ummæli í netfangið ritstjorn@eyjan.is

Eyjan Media ehf. - Kringlunni 4-12, Reykjavík - eyjan(hjá)eyjan.is