Föstudagur 13.10.2017 - 15:45 - Ummæli ()

Fylgisrán um hábjartan dag

Orðið á götunni er að fylgismenn Flokks fólksins séu í unnvörpum að færa sig yfir til Miðflokks Sigmundar Davíðs Gunnlaugssonar. Miðað við stöðuna á könnunum ættu Vinstri græn og Sjálfstæðismenn að vera ánægð með að vera tveir stórir turnar sem koma til greina sem kjölfesta í næstu ríkisstjórn, það er a.m.k. betra en að þurfa að taka þátt í botnslagnum með öllum hinum.

Fylgi Ingu Sæland er byrjað að skreppa saman á sama tíma og Miðflokkurinn bætir við sig fylgi. Orðið á götunni er að Flokkur fólksins eigi eftir að skreppa enn meira saman fram að kosningum vegna titrings innan flokksins. Á morgun mun svo Miðflokkurinn loksins birta stefnuskrá og mun þá að öllum líkindum ná að tæla til sín marga fylgjendur Ingu Sæland.

Slíkt fylgisrán er lýsandi fyrir stöðu íslenskra stjórnmála í dag. Fólk sem vill bætt kjör fyrir öryrkja og aldraða fer frekar yfir til Miðflokksins en yfir til Vinstri grænna og Samfylkingarinnar. Þó svo að þetta geti allt talist félagslegir réttlætisriddarar þá tókst ríkisstjórn  Jóhönnu og Steingríms að binda svo um hnútana að þeir sem verst komu út úr hruninu munu aldrei geta hugsað sér að kjósa hinu hefðbundnu vinstri flokka. Óbeit margra á ESB og aðgerðum vinstristjórnarinnar varð meira að segja til þess að stærsti flokkurinn í kosningunum 2009 nánast hvarf árið 2016.

Þessi undarlega staða hefur gert það að verkum að ein yfirlýsing frá Sigmundi Davíð um að tækla bankana verður að fylgisráni um hábjartan dag.

Ertu með athyglisverða ábendingu?
Sendu okkur póst á ordid@eyjan.is - fyllsta trúnaðar gætt.
Fimmtudagur 12.10.2017 - 20:47 - Ummæli ()

Feluleikur

Orðið á götunni er að sumir stjórnmálaflokkar séu í feluleik með ákveðna stjórnmálamenn til að koma sér ekki í klandur fyrir kosningar. Töldu margir víst að Vinstri græn myndu fela Steingrím J. Sigfússon, oddvita sinn til áratuga í Norðausturkjördæmi, fram yfir kosningar. Svo var ekki og mætti hann, eins og frægt er orðið, í pallborðsumræður fyrir hönd flokksins í Menntaskólanum á Akureyri í vikunni og gerði flokknum engan greiða. Verður Steingrímur því líklega í felum til 29. október næstkomandi.

Brynjar Níelsson þingmaður Sjálfstæðisflokksins sagði nýverið að hann hefði verið beðinn um að fara í felur og einbeita sér að kökuskreytingum. Það varði ekki lengi og lætur Brynjar eins og ekkert hafi í skorist á Fésbók. Enda er um að ræða mann sem er ekki þekktur fyrir að liggja á skoðunum sínum.

Enn á eftir að koma í ljós hvort Miðflokkurinn fari í feluleik. Gunnar Bragi Sveinsson fékk ekki oddvitasæti í Norðvesturkjördæmi en það á eftir að koma í ljós hvort hann dúkki upp annarsstaðar á landinu. Svo er alltaf spurningin hvort Miðflokkurinn tefli fram frambjóðendum úr Samvinnuflokknum eða hvort allir þaðan verði faldir fyrir kjósendum.

Svo er spurning hvort Viðreisn sé í feluleik. Benedikt Jóhannesson stofnandi flokksins verður ekki formaður flokksins þar sem flokkurinn telur vænlegra að tefla fram Þorgerði Katrínu Gunnarsdóttur sem formanni í stað Benedikts. Athygli vekur að varaformaðurinn, Jóna Sólveig Elínardóttir, varð ekki formaður eins og venja er með varaformenn. Einnig er það orðið á götunni að flokkurinn hafi farið gegn eigin reglum um að einstaklingar af gagnstæðu kyni séu í formanns og varaformannsembætti. Það á nú eftir að koma í ljós hvort Benedikt verði falinn fram að kosningum og hvort Viðreisn fái fleiri atkvæði með Þorgerði Katrínu í brúnni eða ekki.

Ertu með athyglisverða ábendingu?
Sendu okkur póst á ordid@eyjan.is - fyllsta trúnaðar gætt.
Fimmtudagur 5.10.2017 - 16:19 - Ummæli ()

Sigmundur skapar óvin

Orðið á götunni er að Sigmundur Davíð Gunnlaugsson forsvarsmaður Miðflokksins sé búinn að velja sér óvin til að hamast á út kosningabaráttuna – bankana.

Sigmundur Davíð er ekki frambjóðandi sem reynir að ná breiðri skírskotun með því að hafa skoðun á öllum málefnum. Þess í stað finnur hann sér örfá mál sem aðrir stjórnmálamenn hafa ekki hugmyndaflug til að tækla og býr til óvin. Fátt hefur heyrst um málefnaafstöðu innan Miðflokksins fyrir utan að færa eigi Landspítalann upp á Vífilstaði og að það sé í himnalagi að eiga peninga á Bresku Jómfrúreyjum. Á meðan Sjálfstæðisflokkurinn talar um stöðugleika og vinstrimenn um góðmennsku þá mun Sigmundur Davíð búa til svo voldugan óvin að aðeins hann einn mun geta sigrað hann.

Össur Skarphéðinsson fyrrverandi ráðherra segir að það að búa til óvin sé aðferð popúlista. Við gefum Össurri orðið:

Sigmundur er svo taktískur áróðursmaður að með meistaralegum hætti hefur honum tekist að þvæla Wintris-málinu þannig að í dag finnst mönnum það bara snúast um tæknilegar túlkanir á skatti. Þjóð, sem gleymir öllu og finnst það enginn sérstakur glæpur að fara eins langt og hægt er gagnvart skattinum, fær á endanum hálfvegis samúð með honum.

Langvarandi ofbeldistaktík hans gagnvart fjölmiðlum hefur líka skilað honum töluverðum árangri. Þeir þora ekki í hann af neinni alvöru lengur, allra síst í kosningabaráttu. Þá undanskil ég Harmageddon og Kjarnann. En óskiljanleg frétt RÚV á þriðjudagskvöldið sýndi þetta vel.

Hótanir hans um lögsóknir á fjölmiðla – sem ólíklegt er að hann standi við nema illa fari í kosningunum – virðast úthugsuð strategía. Fjölmiðlunum bregður, og taka enn mildar á honum en ella. Um leið snertir hann duldan streng hjá parti þjóðarinnar sem finnst fjölmiðlar hamast of mikið á fólki og eyðileggja of mikið í kringum sig. Nýlegt glappaskot RÚV gagnvart veitingastað á Akureyri dró ekki úr slíkum kenndum.

Sigmundur er skorpumaður í pólitík, en hefur ekki mikið úthald. Hann er hins vegar allra manna vígfimastur í stuttri höggorrustu. Þessvegna er örstutt kosningabarátta einsog klæðskerasniðin fyrir hann. Hann lítur svo á að hún snúist öðrum þræði um pólitískt líf hans og æru. Það er því líklegt að hann fari eldi spúandisk um sviðið.

Málefni flokkanna eru með dauflegasta móti og af þeirra hálfu er líklegast að kosningabaráttan muni snúast um “same old, same old.” Sigmundur mun hins vegar reiða hátt til höggs og velja sér andstæðing sem hann telur að hægt sé að sameina sem flesta gegn. Þannig reka pópulistar sínar baráttur. Á vorum dögum hugsa margir bönkunum þegjandi þörfina eftir skuldahremmingar síðustu ára. Fólk vill að það verði tekið á fjármálakerfinu – en enginn flokkanna sýnir sérstök merki um að skilja það.

Ég leyfi mér að spá því að Sigmundur Davíð fari með eldi og brennisteini á hendur bönkunum, og geri þá að helsta skotspæni Miðflokksins í komandi kosningaslag. Um leið mun hann boða sterka þjóðernishyggju, vara við of mörgum útlendingum, og yfir öllu saman mun píslarvætti formanns Miðflokksins leika einsog vafurlogi.

Við lifum á pópúlískum tímum. Ef einhver er pópulísti dauðans í íslenskum stjórnmálum er það Sigmundur Davíð.

Svo mörg voru þau orð.

Það liggur fyrir að meginþorra almennings misbýður að sjá háar fjárhæðir renna í vasa bankamanna á meðan hrunið 2008 er enn í fersku minni og það er aðeins tímaspursmál hvenær stjórnvöld grípa í taumana, hvort sem það verður á næsta kjörtímabili eða þarnæsta.

Nú er bara spurningin, verður einhver annar flokkur á undan Sigmundi Davíð að koma með háværar yfirlýsingar um græðgi fjármálakerfisins eða nær hann að búa til óvininn sem hann þarf stuðning þjóðarinnar til að sigra?

Ertu með athyglisverða ábendingu?
Sendu okkur póst á ordid@eyjan.is - fyllsta trúnaðar gætt.
Mánudagur 25.9.2017 - 11:28 - Ummæli ()

Átök í Valhöll

Orðið á götunni er að harkalega sé tekist á að tjaldabaki í Valhöll, höfuðstöðvum Sjálfstæðisflokksins.

Gífurlegur hiti varð kringum landsþing SUS á dögunum og ganga alvarlegar ásakanir og hótanir um kærumál á víxl. Áslaug Arna Sigurbjörnsdóttir, ritari flokksins og nú varaformaður, beitti sér mjög harkalega á þinginu og ríkir mikil reiði í hennar garð hjá fjölmörgum sjálfstæðismönnum, ekki síst stuðningsmönnum Guðlaugs Þórs Þórðarsonar utanríkisráðherra.

Skammt er til kosninga. Hugmyndir hafa verið uppi um að stilla upp óbreyttum listum frá því í kosningunum fyrir ári síðan og margir vilja fara þá leið til að tryggja friðinn. Þá færist Brynjar Níelsson upp í fyrsta sæti í öðru Reykjavíkurkjördæminu, enda hefur hann verið oddviti allt frá ótímabæru fráfalli varaformannsins Ólafar Nordal.

En sjálfstæðiskonur segja ekki koma til greina að karlmenn verði oddvitar í öllum kjördæmum flokksins í kosningunum. Bjarni Benediktsson í kraganum, þeir Guðlaugur Þór og Brynjar í Reykjavík, Haraldur Benediktsson í Norðvestur, Kristján Þór Júlíusson í Norðaustur og Páll Magnússon í Suðurkjördæmi.

Allt eru þetta sterkir forystumenn flokksins og ekki tilbúnir að gefa sín sæti eftir baráttulaust. Um þetta verður tekist í dag og næstu daga í Valhöll, enda er lítill tími til stefnu.

Ertu með athyglisverða ábendingu?
Sendu okkur póst á ordid@eyjan.is - fyllsta trúnaðar gætt.
Miðvikudagur 20.9.2017 - 11:02 - Ummæli ()

Sótt að Sigmundi og Gunnari

Sigmundur Davíð Gunnlaugsson.

Orðið á götunni er að innanflokksátökin í Framsóknarflokknum haldi áfram sem aldrei fyrr. Lítill tími er til stefnu fram að kosningum og því er líklegast að stilla þurfi upp á alla framboðslista, þar sem ekki er tími fyrir prófkjör eða tvöföld kjördæmisþing til að kjósa framboðslista, eins og gert hefur verið undanfarin ár.

Þessi óvenjulega staða gerir það að verkum, að menn á borð við Sigmund Davíð Gunnlaugsson, fv. forsætisráðherra og formann flokksins, og Gunnar Bragi Sveinsson, fv. utanríkisráðherra, geta átt á hættu að uppstillingarnefndir hliðhollar flokkseigendafélaginu reyni að koma þeim af framboðslistum flokksins, enda þótt ljóst sé að þeir myndu vinna yfirburðasigur á kjördæmisþingum eða prófkjörum, eins og raunin varð fyrir aðeins rúmu ári síðan.

Orðið á götunni er að í reykfylltum bakherbergjum vinni flokkseigendur í Framsóknarflokknum nú að því að koma sínu fólki fyrir í helstu sætum fyrir komandi kosningar. Þetta er fólk eins og Þórólfur Gíslason kaupfélagsstjóri á Sauðárkróki, Ingibjörg Pálmadóttir fv. ráðherra á Akranesi og Valgerður Sverrisdóttir fv. ráðherra á Lómatjörn.

Framsóknarflokkurinn mælist lágt í skoðanakönnunum þrátt fyrir ótrúlegar pólitískar vendingar og ljóst er að frekari innanflokksátök munu auka enn á vanda flokksins. Þar með er raunveruleg hætta á að varaformaðurinn Lilja Alfreðsdóttir nái ekki kjöri sem þingmaður Reykvíkinga, þótt hún hafi að flestra mati staðið sig afar vel eftir að hún steig inn á stjórnmálavettvanginn með óvæntum hætti, að tillögu Sigmundar Davíðs, þáverandi formanns Framsóknarflokksins..

Ertu með athyglisverða ábendingu?
Sendu okkur póst á ordid@eyjan.is - fyllsta trúnaðar gætt.
Föstudagur 15.9.2017 - 09:39 - Ummæli ()

Að vera eða vera ekki geislavirkur

Orðið á götunni er að Sjálfstæðisflokkurinn logi stafnanna á milli eftir tíðindi gærkvöldsins, þar sem Björt framtíð ákvað á stjórnarfundi að slíta ríkisstjórnarsamstarfinu.

Blöð voru farin í prentun, flestir farnir að sofa þegar svofellt skeyti var sent til fjölmiðla af hálfu stjórnarformanns Bjartrar framtíðar:

„Stjórn Bjartrar framtíðar hefur ákveðið að slíta samstarfi við ríkisstjórn Bjarna Benediktssonar. Ástæða slitanna er alvarlegur trúnaðarbrestur innan ríkisstjórnarinnar.“

Svo mörg voru þau orð. Grasrót flokksins tók völdin, ráðherrarnir stóðu frammi fyrir vonlausri stöðu. Fyrsta ráðuneyti Bjarna Benediktssonar náði ekki einu sinni að mæla fyrir sínu fyrsta fjárlagafrumvarpi áður en það sprakk í loft upp.

Björt framtíð nýtti tækifærið

Fyrir tæplega ári sagði nánasta bakland Bjarna Benediktssonar, formanns Sjálfstæðisflokksins, að forsætisráðherrann Sigmundur Davíð Gunnlaugsson væri hálf geislavirkur og yrði að víkja. Stuttu síðar stendur Bjarni í sömu sporum. Enginn efast um kaldhæðni örlaganna.

Á vettvangi stjórnmálanna telja margir að forystumenn Bjartrar framtíðar hafi fyrir löngu talið ríkisstjórnina búna að vera. Framundan séu fjárlög sem hefðu getað reynst flokknum pólitískt þungbær og ekki hafi skoðanakannanir verið hagstæðar — nema síður sé. Nú hafi flokkurinn látið brotna á prinsippmálum tengdum kynferðisglæpum, sem allur almenningur hefur algjöra andstyggð á, og geti á ný öðlast hlutverk í íslenskum stjórnmálum.

Og framganga ýmissa forystumanna Sjálfstæðisflokksins í þessum uppreist-æru-málum undanfarna daga og vikur hefur verið eins og umferðarslys í hægri endursýningu. Röð af röngum ákvörðunum, þögn og leyndarhyggja. Nefndarmenn flokksins neita að kynna sér gögn og loks upplýsir dómsmálaráðherra að forsætisráðherrann hafi mánuðum saman búið yfir þeirri vitneskju að faðir hans hafi verið einn meðmælenda með barnaníðingi í umsókn um uppreist æru. Hélt þetta fólk í alvöru að þetta myndi ekki komast upp? Að hægt væri að sópa þessu undir teppið?

Vinstri græn og Framsókn bíða átekta

Orðið á götunni er að strax í nótt hafi forystumenn Sjálfstæðisflokks borið sig upp við Vinstri græna og Framsóknarflokk. Þar á bæ vilja menn ekki taka neinar ákvarðanir strax, enda öll kurl ekki enn komin til grafar. Þessir flokkar væru alveg til í kosningar, en það er kostur sem líklega er sá versti í stöðunni á þessum tímapunkti fyrir Sjálfstæðisflokkinn og Viðreisn.

Ekki er staða Benedikts Jóhannessonar innan Viðreisnar betri. Hann vissi um þátt Benedikts Sveinssonar frænda síns undanfarna daga, en sagði ekki neitt. Hann er tengdur Bjarna og Benedikt svo nánum fjölskylduböndum, að hann er einhvern veginn ekki rétti maðurinn til að ræða þessi mál. Enda sagðist Benedikt ekki upplifa trúnaðarbrest, þvert á yfirlýsingar félaga hans innan Bjartrar framtíðar.

Innan Sjálfstæðisflokksins er horft til þess hver gæti leyst Bjarna Benediktsson af hólmi sem formann Sjálfstæðisflokksins og forsætisráðherra, verði þessi mál til þess að hann víki af vettvangi stjórnmálanna. Er þar helst nefndur til sögunnar Guðlaugur Þór Þórðarson utanríkisráðherra, maðurinn með mörgu pólitísku lífin, sá sem lifað hefur af flest banatilræðin í pólitíkinni.

Ertu með athyglisverða ábendingu?
Sendu okkur póst á ordid@eyjan.is - fyllsta trúnaðar gætt.
Fimmtudagur 31.8.2017 - 21:52 - Ummæli ()

Hafna afarkostum Viðreisnar

Orðið á götunni er að alvarleg staða í sauðfjárrækt sé farin að valda miklum titringi í ríkisstjórnarsamstarfinu. Viðtal landshlutablaðsins Vesturlands við Harald Benediktsson, formann fjárlaganefndar og fv. formann Bændasamtakanna, sýnir gremju hans og margra fleiri sjálfstæðismanna með aðgerðaleysi Þorgerðar Katrínar Gunnarsdóttur landbúnaðarráðherra og ekki bætir úr skák að í Valhöll telja menn Viðreisn reyna að kúga bændur í erfiðri stöðu til að taka upp búvörusamningana án þess að ræða það einu orði við samstarfsflokkinn í ríkisstjórn.

Málavextir munu hafa verið þannig, að á fundi ráðuneytisstjórans í sjávarútvegs- og landbúnaðrráðuneytinu með forystu sauðfjárbænda voru mögulegar aðgerðir ræddar til að bregðast við hruni á afurðaverði og offramboði á kindakjöti. Ráðuneytið hafði kynnt ákveðnar tillögur og forysta bænda óskaði eftir tilteknum breytingum á þeim.

Næsta sem gerist í gær, er að aðstoðarmaður fjármálaráðherra kemur þeim skilaboðum á framfæri við bændaforystuna, að skilyrði fyrir slíkum tillögum sé að búvörusamningarnir verði endurskoðaðir. Orðið á götunni er að forystumenn bænda hafi skilið þetta sem hreina afarkosti og þótti sem þarna væru komin skilyrði beint úr kosningastefnuskrá Viðreisnar.

Útspil fjármálaráðherra kom bændum í opna skjöldu og ekki síður þingmönnum Sjálfstæðisflokksins sem brugðust illa við í gær þegar tíðindin spurðust, enda höfðu þeir ekki heyrt á þetta minnst. „Bændur verða ekki kúgaðir til stuðnings við aðgerðaáætlun,“ sagði einn þingmaður Sjálfstæðisflokksins og má ljóst verða, að hart verði tekist á um þessi mál næstu daga, nú þegar sláturtíð er að hefjast.

Þessi sami sjálfstæðisþingmaður bætti við: „Þeim fækkar óðum, ástæðunum fyrir því að styðja þessa blessuðu ríkisstjórn.“

Ertu með athyglisverða ábendingu?
Sendu okkur póst á ordid@eyjan.is - fyllsta trúnaðar gætt.
Þriðjudagur 22.8.2017 - 12:03 - Ummæli ()

Hætta á að flokkurinn þurrkist út

Gísli Kr. Björnsson, formaður Varðar.

Orðið á götunni er að hart sé tekist á innan Sjálfstæðisflokksins í Reykjavík um fyrirkomulag á vali á framboðslista flokksins fyrir komandi borgarstjórnarkosningar. Vörður, full­trúaráð sjálf­stæðis­fé­lag­anna í Reykja­vík, hef­ur samþykkt til­lögu um val á fram­boðslista flokks­ins í Reykja­vík til borg­ar­stjórn­ar­kosn­ing­anna næsta vor.

Til­lag­an kveður á um að haldið sé opið próf­kjör um odd­vita list­ans, en upp­still­ing­ar­nefnd, kjör­in af tæp­lega tvö þúsund meðlim­um full­trúaráðsins, ákveði aðra fram­bjóðend­ur.

Fyrir Verði fer Gísli Kr. Björnsson lögmaður. Í stjórninni, sem hann veitir forystu, sitja for­menn allra sjálf­stæðis­fé­lag­anna í Reykja­vík auk annarra sem kjörn­ir eru á aðal­fundi Varðar. Til­lag­an var samþykkt með 19 at­kvæðum, án mót­atkvæða, á stjórnarfundi á dögunum.

Helstu rökin fyrir henni eru þau, að erfiðlega gangi að fá nýtt hæfileikafólk til að taka þátt í prófkjöri, auka þurfi breidd á framboðslistanum, þar sem hann geti meðal annars endurspeglað búsetu í ólíkum hverfum borgarinnar og tryggt ákveðna endurnýjun. Undirliggjandi er ótti margra sjálfstæðismanna við enn eitt kjörtímabilið í minnihluta, ef ekki verði gripið til róttækra aðgerða.

Bessí Jóhannsdóttir.

Athygli vekur að félag sjálfstæðiskvenna er ósátt við tillöguna nú, enda þótt Hvöt hafi jafnframt harmað niðurstöðu undanfarinna ára í prófkjörum og farið fram á breytingar á framboðslistum eftir á.

En Gísli Kr. Björnsson fær þungavigtarstuðning í grein í Morgunblaðinu í dag, þar sem Bessí Jóhannsdóttir stingur niður penna, en hún hefur verið áhrifakona í Sjálfstæðisflokknum í borginni um áratugaskeið; formaður Hvatar lengi vel og varaþingmaður, svo dæmi séu tekin.

Bessí hjólar í grein sinni í Arndísi Kristjánsdóttur, formann sjálfstæðiskvennafélagsins Hvatar, og skrifar:

Ef full­trúaráðið samþykk­ir ekki til­lög­una er veru­leg hætta á því að Sjálf­stæðis­flokk­ur­inn þurrk­ist út í Reykja­vík í kosn­ing­um í vor eða í þar næstu borg­ar­stjórn­ar­kosn­ing­um, þótt höfuðborg­in hafi á árum áður verið höfuðvígi flokks­ins í meira en sex ára­tugi.

Og hún bætir við:

„Finnst Arn­dísi lýðræðis­legt að Sjálf­stæðis­flokk­ur­inn í Reykja­vík bjóði fram lista þar sem kannski ein eða eng­in kona verður í fyrstu fimm efstu sæt­un­um, eng­inn full­trúi ungs fólks né eldri borg­ara og eng­inn full­trúi efri byggða borg­ar­inn­ar, sem þó eru í mikl­um meiri­hluta borg­ar­búa, s.s. Breiðholts, Árbæj­ar­hverf­is, Sel­ás­hverf­is, Norðlinga­holts, Grafar­vogs, Grafar­holts eða Úlfarsár­dals, ef niðurstaða próf­kjörs verður sú? Ætlar hún þá að una sínu beina lýðræði, eða ætl­ar hún að heimta það aft­ur að kjör­nefnd „leiðrétti“ list­ann, eins og hún og Hvöt gerðu eft­ir opið próf­kjör til alþing­is­kosn­ing­anna í fyrra?“

Og lokaorð Bessíar eru þessi:

Ætlar nú Arn­dís að bjóða ein­stak­ling­um að eyða millj­ón­um í próf­kjör og breyta síðan regl­un­um eft­ir á? Já, reynd­ar! Því ef þú hleyp­ur eft­ir duttl­ung­um fjöld­ans og breyt­ir stjórn­mála­skoðunum þínum eins og Par­ís­ar­tísk­an breyt­ist, frá vori til hausts, þá fyrst ertu kom­inn út á veru­lega hálan ís.

Ertu með athyglisverða ábendingu?
Sendu okkur póst á ordid@eyjan.is - fyllsta trúnaðar gætt.
Fimmtudagur 10.8.2017 - 11:20 - Ummæli ()

Fer Davíð í borgina?

Davíð Oddsson, fv. borgarstjóri og forsætisráðherra.

Orðið á götunni er að sífellt fleiri sjálfstæðismenn í Reykjavík horfi til ritstjóra Morgunblaðsins í örvæntingarfullri leit sinni að kandídat sem geti leitt flokkinn í komandi borgarstjórnarkosningum og fellt meirihluta Dags B. Eggertssonar borgarstjóra.

Eyðimerkurganga Sjálfstæðisflokksins í borginni er orðin æði löng og Reykjavík er sannarlega ekki lengur það krúnudjásn í valdakerfinu í Valhöll sem áður var. Nú er staðan sú, að þrátt fyrir verulegar óvinsældir meirihlutans, er fátt sem bendir til þess að minnihluti sjálfstæðisflokksins og framsóknarmanna nái vopnum sínum. Sem verður að teljast með nokkrum ólíkindum.

Og þá er horft til þess að á ritstjórastól Morgunblaðsins er maður sem hefur unnið hvað stærsta sigra innan Sjálfstæðisflokksins, bæði í borgarstjórn og á landsvísu. Davíð Oddsson var svo vinsæll borgarstjóri, að flokkurinn fékk ekki aðeins hreinan meirihluta, heldur vann hann með algjörum yfirburðum. Fjölmargir úr röðum vinstri manna segja enn, að Davíð sé besti borgarstjóri sem borgarbúar hafi átt.

Fulltrúaráð sjálfstæðisfélaganna hefur nú farið þá leið að efna til kosningar um oddvita flokksins í komandi kosningum, en raða að öðru leyti á lista. Það er líklega skynsamleg leið, ef ætlunin er að tryggja einhverja endurnýjun og fjölbreytni í frambjóðendahópnum.

En ætli Davíð Oddsson sé klár í slaginn?

Stjórnmálaspekúlantar stöldruðu alltént við þessa klausu í leiðara Morgunblaðsins sl. laugardag:

Allt bend­ir til að nú­ver­andi borg­ar­yf­ir­völd telji sig aldrei munu þurfa að standa skil aðgerða sinna eða aðgerðal­eys­is. Þau ættu þó að hafa í huga að það stytt­ist í að borg­ar­bú­ar geti sagt skoðun sína á óreiðunni. Væri ekki betra að taka aðeins til áður en sú stund renn­ur upp? Eða ætl­ar borg­ar­stjóri að treysta á að eng­inn ann­ar kost­ur verði í boði? Það er hættu­legt veðmál.

Svo mörg voru þau orð.

Ertu með athyglisverða ábendingu?
Sendu okkur póst á ordid@eyjan.is - fyllsta trúnaðar gætt.
Föstudagur 14.7.2017 - 12:45 - Ummæli ()

Skattahækkanir

Orðið á götunni er að stemningin hafi verið orðin heldur súr innan Sjálfstæðisflokksins með stjórnarsamstarfið og yfirlýsingar tveggja ráðherra Viðreisnar, sem boða beinar skattahækkanir, hafi gert ástandið miklu verra.

Benedikt Jóhannesson fjármálaráðherra boðaði í vikunni að tollar og gjöld á díselolíu verði hækkuð til að jafna stöðu þess eldsneytisgjafa gagnvart bensíni. Auðvitað datt honum ekki í hug að lækka gjöldin á bensínið til að jafna stöðuna.

Útvarpsgjald er hækkað, þótt einkareknir fjölmiðlar eigi allir í vök að verjast. Og nú er tilkynnt um stórhækkun veiðigjalda á útgerðina og miðað við afkomuna árið 2015, enda þótt allir viti að gengisbreytingar síðan hafi gjörbreytt rekstrarumhverfinu í sjávarútvegi.

Stutt er síðan kynnt voru áform um hækkun virðisaukaskatts á ferðaþjónustu, þvert á gefin loforð.

Á sama tíma er orðið ljóst að ríkisstjórnin ætlar ekki að standa við loforð til fyrirtækjanna í landinu um að lækka tryggingagjaldið, þótt atvinnuleysi sé nánast ekki neitt.

Á sínum tíma var ríkisstjórn Bjarna Benediktssonar kölluð sú hægri sinnaðasta í lýðveldissögunni. Ekkert bendir til þess að það sé rétt. Ríkisstjórn sem hækkar bara álögur á einstaklinga og fyrirtæki og stendur ekki við gefin fyrirheit um skattalækkanir er bara gamaldags vinstri stjórn.

Hvað er Bjarni Benediktsson að gera sem forsætisráðherra í slíkri ríkisstjórn? Ætlar hann að láta þetta yfir sig og Sjálfstæðisflokkinn ganga?

Ertu með athyglisverða ábendingu?
Sendu okkur póst á ordid@eyjan.is - fyllsta trúnaðar gætt.

Eyjan Media ehf. - Kringlunni 4-12, Reykjavík - eyjan(hjá)eyjan.is