Miðvikudagur 28.3.2018 - 11:44 - Ummæli ()

Refskák

Orðið á götunni er að Vladimir Pútín, Rússlandsforseti viti nú ekki sitt rjúkandi ráð yfir þeirri snilldarlegu ákvörðunar Guðlaugs Þórs Þórðarsonar og ríkisstjórnar Íslands, að sniðganga HM í knattspyrnu vegna Skrípal málsins. Háttsettir erindrekar hafa haft á orði, að slík pólitísk refskák hafi ekki sést í alþjóðasamskiptum síðan á dögum Kalda stríðsins.

 Pútín er víst ekki vanur að fá sendar slíkar eiturpillur frá jafn háttskrifuðum embættum smáþjóða. Sem fyrrverandi KGB útsendari, er hann þó vanur eiturpillum af ýmsu tagi, sem sumir segja að hafi komið sér vel í forsetatíð hans.

 Steininn tók þó úr er Pútín var greint frá því að Guðlaugur Þór hefði sagt við Morgunblaðið, að hugsanlega yrði gripið til frekari aðgerða vegna málsins.

 Ku kappinn í Kreml, sem kallar ekki allt ömmu sína, hafa orðið svo miður sín er hann heyrði af þessu, að félagi Lavrov, utanríkisráðherra Rússlands, varð að setja forsetann í læsta hliðarlegu.

Ertu með athyglisverða ábendingu?
Sendu okkur póst á ordid@eyjan.is - fyllsta trúnaðar gætt.
Þriðjudagur 27.3.2018 - 12:47 - Ummæli ()

Sendiherrann og kvennabúrið

Orðið á götunni er að ónefndur sendiherra Íslands sé nú staddur í Suður-Ameríku. Sú heimsálfa hefur upp á margt að bjóða og þeir sem þangað fara eru gjarnan uppnumdir af fegurð hennar og menningu, enda afar fjölbreytt, falleg og ægileg í senn.

Menning og hefðir annarra landa fara þó ekki ávallt saman við menningu og gildi íslendinga og þykir það því nokkuð merkileg upplifun fyrir bleiknefja frá Íslandi að ganga fram á kvennabúr, jafnvel þó um lífsreyndan sendiherra sé að ræða. Slík búr hafa ekki tíðkast á Íslandi, en til glöggvunar skal tekið fram að kvennabúr er ekki annað nafn yfir hefðbundið kvennafangelsi, þó svo frelsissvipting komi við sögu í báðum tilfellum.

Orðið á götunni er að umræddur sendiherra hafi birt mynd af hinu sögufræga kvennabúri á samfélagsmiðlum, en láðst að greina frá samhengi erindagjarða sinna, sem geti valdið ákveðnum misskilningi, þar sem saga kvennabúra í Suður-Ameríku er kannski ekki almenn vitneskja meðal  Frónarbúa.

Tekið skal fram, svo úr verði ekki alþjóðlegt hneyksli og milliríkjadeila, að sendiherrann er ekki í opinberri heimsókn, heldur í fríi á eigin vegum og kvennabúrið sjálft er galtómt og ævafornt.

Ertu með athyglisverða ábendingu?
Sendu okkur póst á ordid@eyjan.is - fyllsta trúnaðar gætt.
Mánudagur 26.3.2018 - 12:17 - Ummæli ()

Þegar sannfæringin gleymist

Orðið á götunni er að oft reynist stjórnmálamönnum erfitt að muna eigin skoðanir á ýmsum málum. Þetta hafi komið í ljós í prófkjöri Pírata í Reykjavík um helgina, þegar frambjóðandi nokkur tók kosningapróf á netinu. Í aðdraganda prófkjörsins var búið til svokallað kosningapróf til handa kjósendum, sem finnur út hvaða frambjóðandi hentar viðkomandi kjósanda best, eftir því hvernig hann svarar spurningum prófsins. Við gerð slíks prófs þarf frambjóðandinn að skila inn skoðunum  sínum fyrirfram og forritari hanterar svörin inn í formúlu sem parar saman svör kjósenda við skoðanir frambjóðenda. Slík próf hafa verið alþekkt um nokkuð skeið, í Alþingis-, sveitastjórnar,- og forsetakosningum.

 

Orðið á götunni er að Þórlaug Borg Ágústsdóttir, frambjóðandi Pírata í Reykjavík, hafi svarað kosningaprófi Pírata, í þeirri von um að kosningaprófið skilaði þeirri niðurstöðu að hún sjálf væri heppilegasti frambjóðandinn til að kjósa, augljóslega, enda þurfti Þórlaug aðeins að svara spurningum prófsins eftir eigin samvisku til þess að fá þá niðurstöðu.

Það varð hinsvegar ekki niðurstaðan.

Mun Þórlaug hafa komið þessu á framfæri meðal kollega sinna og kennt gölluðu forriti um hina óheppilegu niðurstöðu. Hinsvegar virðist enginn galli hafa fundist og niðurstaða annarra frambjóðenda komið 100% heim og saman við svörin sem þeir gáfu.

Orðið á götunni er að Þórlaug hafi gleymt eigin sannfæringu…

Ertu með athyglisverða ábendingu?
Sendu okkur póst á ordid@eyjan.is - fyllsta trúnaðar gætt.
Föstudagur 23.3.2018 - 09:29 - Ummæli ()

Umboðsmannaborgarblús

Orðið á götunni er að nokkur skjálfti sé meðal ýmissa starfsmanna borgarinnar, enda borgarstjórnarkosningar framundan og hætt við að með nýrri forystu komi nýtt og breytt verklag. Gjarnan er minnst á kústa eða vendi í þessu sambandi. Bera slíkar breytingar gjarnan hið hlutlausa og saklausa nafn „skipulagsbreytingar“ eða „hagræðing“  þó það feli ávallt í sér uppsagnir, mannabreytingar eða jafnvel upprætingu heilu embættanna.

Embætti Umboðsmanns borgarbúa var stofnað árið 2013 til þess að vera eins konar hjálparhella og milliliður borgarbúa gagnvart skrifræðiskerfinu. Eða líkt og segir á heimasíðunni: „…styrkja tengslin milli borgarbúa og borgarkerfis og stuðla að auknu réttaröryggi borgarbúa.“

Orðið á götunni er að Umboðsmaður borgarbúa telji nú starfsöryggi sínu veralega ógnað. Embættismaðurinn ku vera sveittur við lyklaborðið að uppfæra ferilskrá sína og líta í kringum sig eftir nýju starfi. (Embætti Umboðsmanns Íslands er víst laust, þar sem Einar Bárðarson er kominn í vinnu hjá Hafnarfjarðarbæ.)

Ástæðan er sú að Eyþór Arnalds, borgarstjóraefni Sjálfstæðisflokksins virðist ekki sérstaklega upp með sér yfir tilgangi eða afköstum embættisins. Segir Eyþór að þangað geti borgarbúar leitað og á meðan trufli þeir ekki borgarfulltrúa eða borgarstjóra með kvabbi sínu, þannig komi borgarstjóri sér undan að veita borgarbúum áheyrn. Hann tekur fram að umboðsmaðurinn hafi engin völd og skili því aðeins áliti eða frávísun til fólks sem þangað leiti. Hann nefnir að það geti tekið allt upp undir 80 daga fyrir umboðsmanninn að fá svör frá skipulagssviði og að kerfið finni þar á eigin skinni það sem borgarbúar þurfa að búa við, þar sem algengasta niðurlag fundargerða þar á bæ sé orðið: „frestað“. Þessu segist Eyþór ætla að breyta.

Orðið á götunni er að setjist Eyþór í borgarstjórastólinn, verði embætti Umboðsmanns borgarbúa lagt niður í sinni núverandi mynd.

Ertu með athyglisverða ábendingu?
Sendu okkur póst á ordid@eyjan.is - fyllsta trúnaðar gætt.
Mánudagur 19.3.2018 - 15:01 - Ummæli ()

Rússneskar kosningar

Orðið á götunni er að rússneskar kosningar séu víðar að finna en í Rússlandi. Þannig eru þær nefndar kosningarnar, þar sem enginn mótframbjóðandi er og/eða víst þykir hver kosinn verður, vegna væntanlegra yfirburða, líkt og tíðkaðist í gömlu Sovétríkjunum þar sem enginn dirfðist að fara gegn foringjanum, hvort sem hann hét Stalín eða Khrushchev. Nú er það Pútín.

Því þykir það í frásögur færandi þegar stjórnmálaflokkar á Íslandi, sem allir kenna sig við lýðræði, fá ekki mótframbjóðanda í tiltekin embætti innan flokksins.

Fjórir íslenskir stjórnmálaflokkar hafa nú haldið landsfundi eða flokksþing á síðustu vikum og hafa engir mótframbjóðendur verið um æðstu embætti þeirra. Samfylkingin, Framsóknarflokkurinn, Viðreisn og Sjálfstæðisflokkurinn eru allt flokkar sem hafa boðið upp á rússneskar kosningar um æðstu embættin.

Sögulega séð getur jafnvel Sjálfstæðisflokkurinn, sem talinn er með foringjahollari hagsmunahópum landsins, státað af þremur framboðum gegn sitjandi formanni í seinni tíð. Davíð Oddson gegn Þorsteini Pálssyni, Hanna Birna gegn Bjarna Ben og auðvitað Pétur heitinn Blöndal, sem fór fram gegn Bjarna Ben árið 2010, aðeins til þess að lýðræðið fengi að njóta sín, líkt og hann komst að orði.

Þetta er því vert umhugsunarefni fyrir fólk í flokkum sem kenna sig við lýðræði, hvort það væri nokkuð úr vegi að bjóða upp á það í meiri mæli ?

Ertu með athyglisverða ábendingu?
Sendu okkur póst á ordid@eyjan.is - fyllsta trúnaðar gætt.
Föstudagur 16.3.2018 - 15:00 - Ummæli ()

Tan á Tene

Orðið á götunni er að Brynjar Níelsson, þingmaður Sjálfstæðisflokksins, hafi skroppið í sólina á Tenerife. Það er hollt og nauðsynlegt hverjum þingmanni að taka sér hvíld frá amstri dagsins og hlaða rafhlöðurnar fyrir átökin framundan. Svokölluð nefndarvika er ágæt til þess fallin að kúpla sig út og njóta lífsins, en Brynjar er ekki formaður neinnar nefndar og getur því legið áhyggjulaus í sólinni, á fullum launum, þar sem hann kallaði ekki eftir varamanni.

Hver veit nema Brynjar taki við keflinu sem Árni Páll Árnason skildi eftir sig á þinginu, en hann þótti jafnan vera hörundsdekkri en almennt gengur og gerist og eðlilegt þykir, meðal bleiknefja á Alþingi. Var gjarnan talað um dökkbrúna Chesterfield sófa í því sambandi. Hvort brúnka Brynjars komist á sama stall og Árna Páls verður þó að teljast ólíklegt, þar sem Árni Páll útskýrði sjálfur að hann væri einfaldlega þannig af guði gerður, meðan Brynjar þarf að treysta á sællega sólbrúnku, eða tvöfaldan túrbótíma í ljósabekk. Með nýjum perum.

 

Ertu með athyglisverða ábendingu?
Sendu okkur póst á ordid@eyjan.is - fyllsta trúnaðar gætt.
Miðvikudagur 14.3.2018 - 14:10 - Ummæli ()

Þegar Ragnar bjargaði lífi heimsfrægs boltasparkara

Orðið á götunni er að Ragnar Önundarson, viðskiptafræðingur, sem þekktur er fyrir útlitsgagnrýni sína í garð Áslaugar Örnu Sigurbjörnsdóttur, ritara Sjálfstæðisflokksins, hafi fyrir mörgum árum bjargað lífi heimsfrægrar knattspyrnukempu. Ku Ragnar hafa verið við golfiðkun í Portúgal árið 2004, degi eftir að heimamenn höfðu lotið í gras fyrir Grikkjum, sem urðu Evrópumeistarar í knattspyrnu, mörgum til vonbrigða.

Þennan dag var óvenju heitt í borginni Sintra. Ragnar og félagar hans tóku því nóg af vatni með sér á golfvöllinn, þar sem bleiknefjar slíkir eiga oft bágt í sólinni. Þegar Ragnar og fylgisveinar hans voru hálfnaðir með hringinn, drógu tveir ungir heimamenn þá félaga uppi við 9. holuna. Voru þeir aðframkomnir af þorsta og urðu því fyrir miklum vonbrigðum með að sjálf sjoppan var lokuð. Reyndust þá góð ráð dýr. Annar þessara heimamanna reyndist vera heimsfrægur tuðrusparkari, sem látið hafði í minni pokann daginn áður fyrir Grikkjum. Ragnar sá aumur á tvíeykinu og  bauðst vitanlega til að brynna boltasparkaranum og vini hans, enda nóg af vatni til á þeim bænum. Ragnar hefur sjálfur sagt, að það hafi reynst gaman að hafa náð að bjarga mannslífi, en þessi boltasparkari reyndist vera sjálfur Loðvík Fíkja, eða Louis Figo, þá fyrirliði Portúgals og eitt sinn dýrasti knattspyrnukappi heims og ein stærsta stjarna knattspyrnustórveldisins  spænska, Real Madrid.

Ertu með athyglisverða ábendingu?
Sendu okkur póst á ordid@eyjan.is - fyllsta trúnaðar gætt.
Þriðjudagur 13.3.2018 - 16:43 - Ummæli ()

Prestapönk í hönk

Orðið á götunni er að vegir guðs séu órannsakanlegir um þessar mundir, sem sjáist best á fréttum af útvarpi Sögu og séra Davíð Þór Jónssyni, þjóðkirkjupresti, sem ort hefur ansi harðort erindi um ljósvakamiðilinn fyrir væntanlega plötu pönkhljómsveitarinnar Austurvígstöðvarnar. Eru andans menn ekki allir vissir um hvort Jesú myndi samþykkja slíka hegðun hans þjóns á jörðu niðri, meðan aðrir segja allt leyfilegt þegar pönk er annarsvegar. Útvarp Saga hefur brugðist við, meðal annars með því að grafa upp gömul ummæli Davíðs þar sem hann á að hafa úthúðað þeim sem börðust gegn unglingadrykkju á útihátíðinni Uxa´95. Já langt er seilst í kristnum kærleik.

Svo eru þeir sem segja þetta öfugsnúið pönk hjá prestinum. Orðið á götunni er að einn varaborgarfulltrúi Sjálfstæðisflokksins, sem teljist almennt listhneigður og frjálslyndur, sé hreint ekki ánægður með framlag prestsins. Hann telji það öfugsnúið pönk þegar það sé notað af valdsmanni, sem þiggi góð laun frá ríkinu, í að níða niður fólk sem er að berjast í bökkum í einkageiranum. Það er, þeir sem eru innangarðs hjá valdinu noti pönk til að níðast á þeim sem eru utangarðs. Þess ber þó að geta, að umræddur varaborgarfulltrúi hefur áður gert tilraunir með kaldhæðni og meining hans því óljós þegar þetta er ritað.

 

Ertu með athyglisverða ábendingu?
Sendu okkur póst á ordid@eyjan.is - fyllsta trúnaðar gætt.
Mánudagur 12.3.2018 - 10:57 - Ummæli ()

Fýlupúkafélagið fékk ekki framgöngu í fimmtugsafmæli

Orðið á götunni er að fimmtugsafmæli Guðlaugs Þórs Þórðarsonar, utanríkisráðherra Sjálfstæðisflokksins, sem haldið var í Hvalasafninu um helgina, hafi heppnast vel. Að vísu varð Guðlaugur fimmtugur þann 19. desember síðastliðinn, en kaus að halda upp á það nú, sökum anna. Fjölmargir sóttu veisluna, sem var hin glæsilegasta og héldu til dæmis Bjarni Benediktsson, formaður Sjálfstæðisflokksins og Katrín Jakobsdóttir forsætisráðherra, tölu í tilefni dagsins og enn fleiri mærðu gestgjafann á góðri stund.

 

Það var því nokkuð stór skugginn sem féll á veisluna, þegar ljóst var að það skemmtiatriði sem allir biðu eftir, með öndina í hálsinum, fékk ekki að fara á svið. Því þegar kom að æðstastrumpi hins svokallaða Fýlupúkafélags að segja gamansögur af afmælisbarninu, væntanlega á kostnað ráðherrans, var skyndilega lokað fyrir öll ræðuhöld ! Höfðu menn á orði, að vantrauststillögur hefðu verið lagðar fram til höfuðs ráðherra af minna tilefni. Stór orð eins og „leyndahyggja“ og „þöggun“ eru sögð hafa flogið um salinn einnig. Fýlupúkafélagið er félagsskapur þingmanna Sjálfstæðisflokksins þar sem Brynjar Níelsson er sagður nokkuð fyrirferðarmikill, enda annálaður húmoristi, en félagið var stofnað snemma á síðasta ári.

Orðið á götunni er að skýringin fyrir þessari skyndilokun á ræðuhöld Fýlupúkafélagsins hafi verið sú, að utanríkisráðherra hafi talið það stjórnarskrárvarinn rétt veislugesta, að þurfa ekki að hlýða á Brynjar Níelsson…

Ertu með athyglisverða ábendingu?
Sendu okkur póst á ordid@eyjan.is - fyllsta trúnaðar gætt.
Fimmtudagur 8.3.2018 - 12:00 - Ummæli ()

Bévítans gleymskan

Orðið á götunni er að gleymska geti oft komið mönnum í koll. Almenna kenningin er sú að mun meiri líkur séu á að viðkomandi gleymi því hvað hann sagði, eftir því sem lengri tími líður frá því að hann sagði það.

Þetta virðist sérstaklega áberandi hjá þaulsetnum stjórnmálamönnum. Þeim er að vísu vorkunn, enda þurfa þeir að tala meira en almennt gengur og gerist, bæði í pontu, við fjölmiðla og á samfélagsmiðlum, enda vilja þeir koma skoðunum sínum á framfæri, sem er eðli stjórnmálanna.

Þetta getur þó reynst þeim hvimleitt. Allir vita að það getur reynst stjórnmálamönnum erfitt að fara eftir eigin samvisku í pólitík og því er gleymskunni ekki á það bætandi.

Gömul ummæli geta reynst óþægileg, þar sem þau eru gjarnan á skjön við gjörðirnar. Ekki síst ef þau beinast að kollegum á þingi, sem síðar þarf að vinna með í ríkisstjórn.

Dæmi um slík ummæli er eftirfarandi:

„Nú hefur æðsti dómstóll landsins talað-ráðherrann braut landslög. Afleiðing af slíkum embættisafglöpum(sem margir reyndu að benda ráðherranum á í tíma)- afleiðingin hlýtur að verða afsögn ráðherrans. Annað væri staðfesting á því að við höfum ekkert lært af Rannsóknarskýrslu Alþingis. Því vil ég ekki trúa.“

 

Merkilegt nokk, hér er ekki verið að tala um Sigríði Á. Andersen dómsmálaráðherra, heldur Svandísi Svavarsdóttur heilbrigðisráðherra. Það er Sigurður Ingi Jóhannsson, formaður Framsóknarflokksins, sem skrifaði ummælin á bloggsíðu sinni í febrúar 2011, eftir að Hæstiréttur staðfesti dóm Héraðsdóms Reykjavíkur um að Svandís hefði sem umhverfisráðherra ekki mátt synja aðalskipulagi Flóahrepps er varðar Urriðafossvirkjun. Sigurður Ingi var þá óbreyttur þingmaður.

 

Nú sitja þau Svandís og Sigurður Ingi saman í ríkisstjórn, sem ver Sigríði Á. Andersen vantrausti, en Hæstiréttur komst að því að hún hefði brotið stjórnsýslulög. Sumir myndu segja að mál Sigríðar sé alvarlegra í eðli sínu en mál Svandísar, en Sigurður Ingi greiddi atkvæði gegn tillögunni um vantraust á Sigríði í vikunni og missti þar af gullnu tækifæri til þess að standa við orð sín frá 2011, enda ljóst að fleiri þingmenn Framsóknar hefðu fylgt formanni sínum í kosningunni, hefði hann óskað eftir því.

Bévítans gleymskan.

Ertu með athyglisverða ábendingu?
Sendu okkur póst á ordid@eyjan.is - fyllsta trúnaðar gætt.

Eyjan Media ehf. - Kringlunni 4-12, Reykjavík - eyjan(hjá)eyjan.is